Mobile Operator

Mobile Operator របស់​រុស្ស៊ី​ដែល​មាន​ឈ្មោះ​ថា Beeline ស្ថិត​ក្រោម​ស្លាក​សញ្ញា ក្រុមហ៊ុន​ធំ VimpelCom ថ្មីៗ​នេះ​បាន​ប្រកាស​លក់​ភាគហ៊ុន​ទាំង​ស្រុង​របស់​ខ្លួន​ឲ្យ​ទៅ​ដៃ​គូ​ពាណិជ្ជកម្ម​ក្នុង​ស្រុក។ លោក Jo Lunder នាយក​ប្រតិបត្តិ​របស់​ក្រុមហ៊ុន​វិនិយោគ​រុស្ស៊ី VimpelCom បាន​លើក​ឡើង​ថា៖ “​ការ​លក់​ភាគហ៊ុន​​វិនិយោគ​ទាំង​ស្រុង​ទៅ​ឲ្យ​ដៃ​គូ​ក្នុង​ស្រុក​ជា សញ្ញាណ​វិជ្ជមានមួយ​​ដែល ដៃ​គូ​សហការ​របស់​យើង ជា​ម្ចាស់​ទាំង​ស្រុង និង​អាច​គ្រប់គ្រង​អាជីវកម្ម​ស្លាក​សញ្ញា​ក្រុមហ៊ុន​ឲ្យ​ដំណើរ​ការ​ទៅ​មុខ​កាន់​តែ​ល្អ​ប្រសើរ”។ សេចក្ដី​ប្រកាស​លក់​ភាគ​ហ៊ុន​ (របស់​VimpelCom) ​នៅ​កម្ពុជា​នេះ ធ្វើ​ឡើង ​បន្ទាប់​ពី​ក្រុមហ៊ុន​បាន​លក់​ភាគហ៊ុន​របស់​ខ្លួន​ចំនួន ៤៩% នៅ​វៀតណាម ក្នុង​តម្លៃ ៤៥លាន​ដុល្លារ​អាមេរិក កាល​ពី​ថ្ងៃ​ទី ២៤ មេសា ២០១២ កន្លង​ទៅ បន្ទាប់​ពី​ខាត​បង់​​ប្រមាណ ៥២៧​លាន​ដុល្លារ​អាមេរិក។ ប្រភព​ដដែល​បាន​បញ្ជាក់​ទៀត​ថា VimpelCom មាន​សិទ្ធ​ជា​ម្ចាស់​ភាគហ៊ុន លើ​ក្រុមហ៊ុន​បណ្ដាញ​ទូរសព្ទ (Mobile Operator) នៅ​កម្ពុជា រហូត​ដល់​ ៩០% ខណៈ​ដែល​ ១០% ផ្សេង​ទៀត​ជា​របស់​ដៃ​គូ​សហការ​ក្នុង​ស្រុក​គឺ​លោក ហួត វណ្ណថន (Huot Vanthan)។ ក្នុង​បទសម្ភាសន៍​ខាង​លើ ដែល​ចេញ​ផ្សាយ​លើ​គេហទំព័រ​ cellular-news កាល​ពី​ថ្ងៃ​ទី ១៩ មេសា កន្លង​ទៅ​នេះ សង្កត់​ធ្ងន់​ថា ទោះ​បី​ជា​មាន​ការ​បកស្រាយ​ពី​សំណាក់​ថ្នាក់ដឹកនាំ​កំពូល​របស់​VimpelCom (Sotelco)​ ក្ដី ក៏​លោក មិន​បាន​បញ្ជាក់​ពី​តម្លៃ​សរុប លើ​បរិមាណ​ភាគហ៊ុន​ដែល​ខ្លួន​លក់​នោះ​ទេ។ ចំពោះ​ការ​ទិញ​លក់ ខាង​លើ​នេះ​ដែរ ប្រភព ចេញ​ពី​មន្ត្រី​ក្រសួង​ប្រៃសណីយ៍ និង​ទូរគមនាគមន៍ បាន​ឲ្យ​Sabay ដឹង​ថា លោក​មិន​ទាន់​ទទួល​បាន​ដំណឹង​នេះ​យ៉ាង​ណា​នោះ​ទេ ប៉ុន្តែ​ចំពោះ​បំណង​របស់​VimpelCom ចង់​លក់​ភាគហ៊ុន​នោះ លោក​ដឹង​យូរ​ណាស់​មក​ហើយ។ អាស្រ័យ​ដោយ​ប្រភព​ចេញ​ពី​CEO VimpelCom អន្តរជាតិ ទើប​ ​ប្រភព​ចេញ​ពី​ក្រុមហ៊ុន​Beeline ក្នុង​ស្រុក​លើក​ឡើង​ថា មិន​ទាន់​ទទួល​បាន​ដំណឹង​ច្បាស់​នៅ​ឡើយ​ដែរ។ យោងតាម​​ព័ត៌មាន​ដែល​ធ្លាប់​ចេញ​ផ្សាយ​លើ​គេហទំព័រ​ភ្នំពេញបុស្ដិ៍ កាល​ពី​ពាក់កណ្ដាល​ខែ មិនា ២០១២ កន្លង​ទៅ​បាន​ឲ្យ​ដឹង​ថា ទំហំ​ទឹកប្រាក់​ប្រតិបត្តិការ​របស់​Beeline ​ទាំង​នៅកម្ពុជា និង​ វៀតណាម​បាន​ខាតបង់​​រហូត​ដល់​ទៅ​ជាង៥០០លាន​ដុល្លារ អាមេរិក និង​មាន​ចំនួន​អ្នក​ប្រើប្រាស់​ប្រមាណ ៦៣ម៉ឺន នាក់។ ប្រព័ន្ធ​ទូរសព្ទ​Beeline ដែល​កំពុង​ចរាចរ​លើ​ទីផ្សារ​កម្ពុជា​បច្ចុប្បន្ន​មាន060 066 067 068 090 និង​ 031 ដែល​ទើប​នឹង​ចេញ​ប៉ុន្មាន​ខែ​ចុង​ក្រោយ​នេះ។ VimpelCom បោះ​ទុន​វិនិយោគ​នៅ​កម្ពុជា​ ក្នុង​កញ្ចប់​ទឹកប្រាក់​ចំនួន ២៨លាន​ដុល្លារ​អាមេរិក និង​ដំណើរ​ការ​ជា​ផ្លូវការ​លើ​ទីផ្សារ​កម្ពុជា តាំង​ពី​ថ្ងៃ​ទី ១៨ ​ខែ ឧសភា ២០០៩ បន្ទាប់​ពី​ទទួល​បាន​អាជ្ញាប័ណ្ណ​ កាល​ពី​ខែ កក្កដា ២០០៨ ដោយ​ប្រើ​ប្រាស់​ឈ្មោះ​ក្រុមហ៊ុន Sotelco និង​យីហោ Beeline។ VimpelCom ជា​ក្រុមហ៊ុន​ផ្តល់​សេវា​ទូរគមនាគមន៍​​ដ៏​ធំ​​ ​ដែល​បាន​បណ្ដាក់​ទុន​នៅ​តាម​បណ្ដា​ប្រទេស​ជា​ច្រើន​ សរុប​ជិត ២០​ប្រទេស ដូចជា៖ កម្ពុជា វៀតណាម ឡាវ រុស្ស៊ី អ៊ីតាលី អ៊ុយក្រែន កាណាដា អាល់ហ្ស៊េរី កាហ្សាក់ស្ថាន ប៉ាគីស្ថាន​ ​អ៊ូបេគីស្ថាន ​តាហ្ស៊ីគីស្ថាន អាមិននៀ ហ្សកហ្ស៊ី ​បង់ក្លាដេស ​ប៊ូរុនឌី ​ហ្ស៊ីមបាវ៉េ ​អាហ្វ្រិក​កណ្ដាល និង​ប្រទេស​Kyrgyzstan។ អត្ថបទ៖ សេង ណារិទ្ធ​ Tags: ព័ត៌មានបច្ចេកវិទ្យាក្នុងស្រុក, ព័ត៌មានពី Beeline នៅកម្ពុជា