ក្នុងឈុតសំពត់ចងក្បិន និងអាវប៉ាក់ឌិន នារីរបាំខ្មែរកំពុងរាំសម្ដែងនៅវិថីប្រជុំជនថាមឃ្វែរ ឯទីក្រុងញូវយ៉ក។ រូបថត Pete Pin
ភ្នំពេញ : នាវេលាថ្ងៃត្រង់ហៀបរសៀល នៅវិថីប្រជុំជនថាមឃ្វែរ ឯទីក្រុងញូវយ៉ក កាលពីឆ្នាំ១៩៧១ ស្ត្រីខ្មែរ១៨នាក់ដែលក្នុងនោះមានខ្លះនៅជំទង់ និងខ្លះស្ថិតក្នុងវ័យសាមប្លាយនោះ ត្រូវបានគេផ្ដិតយករូបភាពរបស់ពួកនាង ខណៈកំពុងសម្ដែងរបាំបុរាណខ្មែរយ៉ាងរស់រវើក ជាមួយនឹងម្រាមដៃដ៏ទន់ល្វតល្វន់។គ្រងដោយឈុតសំពត់ក្បិនចម្រុះពណ៌ និងអាវប៉ាក់ឌិនប៉ោងស្មា ពួកនាងរាំជាជួរ ហើយក្នុងចំណោមនោះមាននារីរបាំម្នាក់ឈ្មោះ ព្រឿង ឈាង ក៏ស្ថិតក្នុងក្រុមរបាំព្រះរាជទ្រព្យខ្មែរដែរ។ កាលនោះ ក្រុមរបាំបានធ្វើដំណើរទៅសម្ដែងនៅសហរដ្ឋអាមេរិកជាលើកទី១ ហើយរូបថតរបស់ពួកនាងត្រូវបានគេចុះផ្សាយក្នុងសារព័ត៌មានអាមេរិកទៀតផង។ត្រឡប់មកសម័យបច្ចុប្បន្នឆ្នាំ២០១៣ វិញ អ្នកស្រី ព្រឿង ឈាង រួមទាំងនារីរបាំជំនាន់ក្រោយជាច្រើននាក់ទៀត បានប្រមូលផ្ដុំគ្នាដើម្បីសម្ដែងនូវរបាំព្រះរាជទ្រព្យសាជាថ្មី ក្នុងឱកាសបុណ្យមហោស្រពសិល្បៈ និងតន្ត្រីខ្នាតធំមួយ នៅទីតាំងដដែលក្នុងទីក្រុងញូវយ៉ក ដែលកម្មវិធីនេះបញ្ចប់ទៅកាលពីខែមុន។អ្នកថតរូបអាជីព Pete Pin បានព្យាយាមផ្ដិតយករូបសកម្មភាពនេះឲ្យដូចនឹងរូបកាលពីសម័យឆ្នាំ១៩៧១ ដោយប្រើប្រាស់ផ្ទាំងផ្សព្វផ្សាយពាណិជ្ជកម្មទឹកក្រូចកូកាកូឡា និងរូបចម្លាក់Father Duffy ធ្វើជាវត្ថុសម្គាល់។
រូបភាពអតីតកាល និងបច្ចុប្បន្នកាលរបស់នារីរបាំព្រះរាជទ្រព្យនេះត្រូវបានបង្ហោះតាមប្រព័ន្ធហ្វេសប៊ុក និងទាក់ទាញចំណាប់អារម្មណ៍មនុស្សជិត១០ម៉ឺននាក់ តែក្នុងរយៈពេល២សប្ដាហ៍។លោក ព្រីម ភ្លើន នាយកប្រតិបត្តិអង្គការ Season of Cambodia ដែលរៀបចំព្រឹត្តិការណ៍នេះ បានឲ្យដឹងថា៖«វាសបញ្ជាក់ឲ្យឃើញថា វប្បធម៌យើងមានសក្ដានុពលក្នុងការស្ដារឡើងវិញ។ ខ្ញុំគិតថា ជនជាតិខ្មែរទូទាំងសកលលោកពិតជាមានមោទនភាពណាស់»។ក្នុង ចំណោមនារីរបាំក្នុងរូបថតឆ្នាំ១៩៧១ទាំងអស់ មានតែ៤នាក់ប៉ុណ្ណោះដែលនៅរស់រានមានជីវិត ដោយខ្លះត្រូវរបបខ្មែរក្រហមឆក់យកសង្ខារ និងខ្លះទៀតទទួលមរណភាពដោយជរាពាធ។សម្រាប់អ្នកស្រី ព្រឿង ឈាង រូបថតនេះធ្វើឲ្យអ្នកស្រីចងចាំពីការតស៊ូប្រោសព្រំឲ្យសិល្បៈខ្មែររស់រានឡើងវិញ។អ្នកស្រីបានថ្លែងទាំងស្រណោះថា៖«វាធ្វើឲ្យខ្ញុំនឹកឃើញដល់មិត្តភក្តិធ្លាប់រាំជាមួយគ្នា ដែលបានចែកឋានទៅ។ រូបថតនេះពិតជាធ្វើឲ្យខ្ញុំភ្ញាក់ផ្អើល។ វាមានអត្ថន័យខ្លាំងណាស់»។សិល្បការិនីសាង ភស្ដា ដែលបានហាត់របាំខ្មែរតាំងពីអាយុ១៤ឆ្នាំនោះ ក៏បានចូលរួមសម្ដែងរបាំព្រះរាជទ្រព្យនៅវិថីប្រជុំជនថាមឃ្វែរ នាឆ្នាំនេះដែរ។ស្ថិតក្នុងវ័យ២៤ឆ្នាំ សិល្បការិនីរូបនេះបាននិយាយថា៖«ខ្ញុំមានមោទនភាពណាស់ដែលបានចូលរួមក្នុងការរាំឆ្នាំនេះ ព្រោះមានមនុស្សចាប់អារម្មណ៍ច្រើន»។ស្រដៀងនឹងខ្សែជីវិតរបស់អ្នករបាំក្នុងរូបថតខាងលើដែរ អ្នកថតរូប Pete Pin ដែលប្រសូតនៅជំរំជនភៀសខ្លួនក្រោយរបបខ្មែរក្រហម មុននឹងចាកចេញទៅសហរដ្ឋអាមេរិកអំឡុងឆ្នាំ១៩៨០នោះ ក៏មិនសូវស្គាល់ទម្រង់សិល្បៈខ្មែរដែរ។លោកបានឲ្យដឹងថា៖«ខ្ញុំគឺជាខ្មែរសញ្ជាតិអាមេរិកដែលតែងតែមានការងឿងឆ្ងល់ចំពោះអត្តសញ្ញាណ និងទំនាក់ទំនងទៅនឹងទឹកដីកំណើតរបស់ខ្ញុំ ដែលខ្ញុំព្យាយាមផ្សារភ្ជាប់តាមរយៈរូបថតឯកសារ។ ខ្ញុំបានប្រើប្រាស់ម៉ាស៊ីនថតរបស់ខ្ញុំដើម្បីផ្ដិតយករូបភាពសិល្បៈរបាំក៏ដូចជាស្វែងយល់ពីវាដែរ»។បើប្រៀបធៀបរូបថតទាំងពីរ ថ្វីត្បិតតែគុណភាពរូបនិងប្រភេទម៉ាស៊ីនថតផ្ដិតយករូបភាពនោះខុសគ្នាក៏ពិតមែន ប៉ុន្តែនៅពេលដែលដាក់រូបថតទាំងនោះជិតគ្នា វាផ្គុំបានជាសាច់រឿងមួយដែលមានអត្ថន័យយ៉ាងជ្រាលជ្រៅ៕
ប្រភព: camnews.org
.
0 comments:
Post a Comment